Uvira, RDC – Umutwe witwaje intwaro wa M23 watangaje ko wafashe umwanzuro wo gukura ingabo zawo mu mujyi wa Uvira, uherereye mu Ntara ya Kivu y’Amajyepfo muri Repubulika Iharanira Demokarasi ya Congo (RDC), mu cyemezo cyatunguranye cyatangajwe ku mugoroba wo kuri uyu wa mbere.
M23 ivuga ko uyu mwanzuro ugamije gutanga umusanzu mu biganiro by’amahoro no kugabanya umwuka mubi umaze igihe mu burasirazuba bwa RDC, aho imirwano imaze iminsi ihanganishije uyu mutwe wa M23 n’ingabo za Leta ya Congo, zifatanije n’iz’u Burundi.
Mu itangazo ryashyizwe ahagaragara, ubuyobozi bwa M23 bwemeje ko kurekura Uvira ari ikimenyetso cy’ubushake bwo kuganira, ndetse bukavuga ko bwumvise ubusabe bw’abahuza mpuzamahanga, basabye iri huriro gutera intambwe iganisha ku ituze n’amahoro arambye.
M23 yagize iti: “Mu rwego rwo gushyigikira ibiganiro by’amahoro no kugaragaza ubushake bwo gushaka igisubizo kirambye ku makimbirane amaze igihe mu burasirazuba bwa Repubulika Iharanira Demokarasi ya Congo, M23 yafashe umwanzuro wo gukura ingabo zayo mu mujyi wa Uvira.”
Itangazo ry’umutwe wa M23 rivuga ibyo kurekura umujyi wa UVIRA
Umujyi wa Uvira ni umwe mu mijyi ikomeye yo mu burasirazuba bwa RDC, cyane cyane kubera aho uherereye hafi y’umupaka wa Burundi n’uruhare ugira mu bucuruzi n’imigendekere y’umutekano mu karere. Igihe M23 yawigaruriraga, byatumye abaturage benshi bawuhunga, bajya mu nkambi z’impunzi imbere mu gihugu no mu bihugu bituranye.
Abaturage baganiriye n’itangazamakuru batangaje ko iki cyemezo cyakiriwe mu mwuka w’icyizere, nubwo hari abagifite impungenge z’uko umutekano wagaruka byuzuye. Umwe muri bo yagize ati: “Twishimiye ko imirwano ishobora guhagarara, ariko turacyategereje kureba niba amahoro azaba arambye.”
Ku ruhande rw’abasesenguzi ku bibazo by’umutekano mu karere, bavuga ko uyu mwanzuro wa M23 ushobora gufungura amarembo y’ibiganiro byimbitse, ariko bakibutsa ko hakenewe ingamba zifatika zireba impande zose zishyamiranye, zirimo Leta ya RDC, imitwe yitwaje intwaro n’abafatanyabikorwa mpuzamahanga.
Leta ya RDC n’abafatanyabikorwa bayo ntibaragira icyo batangaza ku mugaragaro ku bijyanye n’uyu mwanzuro, gusa imiryango iharanira uburenganzira bwa muntu irasaba ko uburenganzira n’umutekano by’abasivili bishyirwa imbere, ndetse hagakorwa igenzura ku byaha byaba byarakozwe mu gihe cy’imirwano.
Mu gihe amaso yose ahanzwe Uvira n’uturere tuyikikije, benshi bategereje kureba niba uku kurekura umujyi bizahinduka intambwe ifatika iganisha ku mahoro arambye mu burasirazuba bwa RDC, cyangwa niba ari icyemezo cy’igihe gito mu ntambara ikomeje kugora aka karere.
